Matematikk 1.-10. trinn (MAT01‑06)
Kompetansemål og vurdering

Eksempel på samanhengar

Forklaring

Kompetansemål etter 5. trinn

Mål for opplæringa er at eleven skal kunne

  • bruke tal, teikning og konkret til å beskrive og utforske samanhengar mellom brøkar, desimaltal og prosent
  • beskrive brøk som del av ein heil, som del av ei mengd, som ein divisjon og som tal på tallinja
  • bruke tal, tekst, teikning, konkret og praktiske situasjonar for å representere brøkar og kunne omsetje mellom dei ulike representasjonane
  • utvikle og bruke ulike strategiar for rekning med positive tal og brøk og forklare tenkjemåtane sine
  • formulere og løyse problem som har med brøk å gjere
  • utforske og beskrive tilfeldigheit og sannsyn i spel og praktiske situasjonar, og knyte det til brøk
  • bruke tal, tekst, teikning og konkret til å løyse likningar og teste og forklare løysingar
  • bruke rekneark for å lage og løyse oppgåver som handlar om personleg økonomi
  • lage og løyse oppgåver som handlar om tid
  • lage og programmere algoritmar med bruk av variablar, vilkår og lykkjer

Undervegsvurdering

Undervegsvurderinga skal bidra til å fremje læring og til å utvikle kompetanse i matematikk. Elevane viser og utviklar kompetanse i faget på 5. trinn når dei beskriv, bruker og utforskar brøkomgrepet, strategiar i brøkrekning, uformell løysing av likningar, klokke, kalender og økonomi i problemløysing og praktiske situasjonar. Elevane viser og utviklar òg kompetanse i matematikk når dei vekslar mellom ulike representasjonar, stiller matematiske spørsmål og forklarer og argumenterer for eigne og andre sine løysingar. Vidare viser og utviklar dei kompetanse i matematikk ved å ta i bruk formålstenlege strategiar og matematiske omgrep både munnleg og skriftleg.

Læraren skal leggje til rette for elevmedverknad og stimulere til lærelyst ved at elevane får beskrive, bruke og utforske matematikk gjennom å bevege seg, leike, undre seg og arbeide praktisk. Læraren skal vere i dialog med elevane om utviklinga deira i bruk av programmering, matematiske omgrep og forståing av strategiar i brøk og likningar. Elevane skal få høve til å prøve og feile. Med utgangspunkt i kompetansen elevane viser, skal dei få høve til å setje ord på kva dei opplever at dei får til, og kva dei får til betre enn tidlegare. Læraren skal gi rettleiing om vidare læring og tilpasse opplæringa slik at elevane kan bruke rettleiinga for å utvikle rekneferdigheiter og kompetanse i utforsking og problemløysing knytt til brøk og likningar og kommunikasjon.