Matematikk 1.-10. trinn (MAT01‑06)
Kompetansemål og vurdering
Forklaring
Kompetansemål etter 4. trinn
Mål for opplæringa er at eleven skal kunne
- utforske og bruke målings- og delingsdivisjon i praktiske situasjonar
- bruke tal, tekst, teikning og konkret for å utforske divisjon på ulike måtar og omsetje mellom dei ulike representasjonane
- bruke og forklare ulike divisjonsstrategiar
- bruke hovudrekning og skriftleg rekning til å utforske og forklare samanhengar mellom dei fire rekneartane
- estimere, gjere overslag, forklare tenkjemåtar og vurdere kritisk eigne og andre sine modellar og løysingar i arbeid med praktiske situasjonar
- lage rekneuttrykk til praktiske situasjonar og finne praktiske situasjonar som passar til oppgitte rekneuttrykk
- beskrive og utforske eigenskapar ved to- og tredimensjonale figurar ved å bruke vinklar, kantar, hjørne og flater
- måle volum i praktiske situasjonar med ikkje-standardiserte og standardiserte måleiningar og samtale om resultata
- beskrive og utforske strukturar og mønster i leik og spel
- lage algoritmar og uttrykkje dei ved bruk av variablar, vilkår og lykkjer
Undervegsvurdering
Undervegsvurderinga skal bidra til å fremje læring og til å utvikle kompetanse i matematikk. Elevane viser og utviklar kompetanse i faget på 4. trinn når dei beskriv, bruker og utforskar målings- og delingsdivisjon, formålstenlege strategiar og representasjonar i arbeidet med dei fire rekneartane og eigenskapar ved to- og tredimensjonale figurar i leik, problemløysing og praktiske situasjonar. Elevane viser og utviklar òg kompetanse i matematikk når dei vekslar mellom ulike representasjonar, stiller matematiske spørsmål og forklarer og argumenterer for eigne og andre sine løysingar. Vidare viser og utviklar dei kompetanse i matematikk ved å ta i bruk formålstenlege strategiar og matematiske omgrep både munnleg og skriftleg.
Læraren skal leggje til rette for elevmedverknad og stimulere til lærelyst ved at elevane får beskrive, bruke og utforske matematikk gjennom å bevege seg, leike, undre seg og arbeide praktisk. Læraren skal vere i dialog med elevane om utviklinga deira av strategiar i divisjon, forståing av samanhengar mellom dei fire rekneartane og strategiar for å lage rekneuttrykk til praktiske situasjonar og finne praktiske situasjonar som passar til oppgitte rekneuttrykk. Elevane skal få høve til å prøve og feile. Med utgangspunkt i kompetansen elevane viser, skal dei få høve til å setje ord på kva dei opplever at dei får til, og kva dei får til betre enn tidlegare. Læraren skal gi rettleiing om vidare læring og tilpasse opplæringa slik at elevane kan bruke rettleiinga for å utvikle rekneferdigheiter og kompetanse i utforsking og problemløysing knytt til reknestrategiar, måleiningar, modellering og kritisk vurdering av eigne og andre sine løysingar og kommunikasjon med matematiske omgrep og bruk av formålstenlege representasjonar munnleg og skriftleg.