Matematikk 1.-10. trinn (MAT01‑06)
Kompetansemål og vurdering

Eksempel på samanhengar

Forklaring

Kompetansemål etter 10. trinn

Mål for opplæringa er at eleven skal kunne

  • bruke reknereglar og generalisere samanhengar algebraisk
  • utforske kvadratsetningane geometrisk og algebraisk og bruke kvadratsetningane som reknestrategiar
  • lage, løyse og forklare likningssett knytte til praktiske situasjonar
  • utforske og samanlikne eigenskapar ved lineære funksjonar, eksponentialfunksjonar, brøkfunksjonar og andregradsfunksjonar ved å bruke digitale verktøy
  • forklare omgrepet endring per eining og rekne ut stigningstalet til lineære funksjonar
  • utforske og forklare samanhengen mellom konstant prosentvis endring, vekstfaktor og eksponentialfunksjonar
  • hente ut og tolke relevant informasjon og reflektere over moglege konsekvensar ved kjøp og sal, renter på sparing, lån og kredittkjøp
  • planleggje, utføre og presentere eit utforskande arbeid knytt til personleg økonomi
  • modellere situasjonar, presentere resultata og vurdere kor gyldige modellane er
  • utforske matematiske eigenskapar og samanhengar ved å bruke programmering
  • lese og forklare tekstbasert programkode i Python

Undervegsvurdering

Undervegsvurderinga skal bidra til å fremje læring og til å utvikle kompetanse i matematikk. Elevane viser og utviklar kompetanse i faget på 10. trinn når dei beskriv, bruker og utforskar reknereglar, kvadratsetningane, likningssett, eigenskapar til funksjonar og problemstillingar knytte til statistikk og personleg økonomi. Elevane viser og utviklar òg kompetanse i matematikk når dei stiller matematiske spørsmål, forklarer matematiske samanhengar og argumenterer for og vurderer kritisk eigne og andre sine løysingar. Vidare viser og utviklar dei kompetanse i matematikk ved å ta i bruk formålstenlege representasjonar, strategiar og matematiske omgrep både munnleg og skriftleg.

Læraren skal leggje til rette for elevmedverknad og stimulere til lærelyst ved at elevane får beskrive, bruke og utforske matematikk gjennom å bevege seg, leike, undre seg og arbeide praktisk. Læraren skal vere i dialog med elevane om utviklinga deira av kompetanse i modellering, generalisering, matematisk argumentasjon og algoritmisk tenking. Elevane skal få høve til å prøve og feile. Med utgangspunkt i kompetansen elevane viser, skal dei få høve til å setje ord på kva dei opplever at dei får til, og kva dei får til betre enn tidlegare. Læraren skal gi rettleiing om vidare læring og tilpasse opplæringa slik at elevane kan bruke rettleiinga for å utvikle rekneferdigheiter og kompetanse i generalisering, modellering, utforsking og problemløysing knytt til dei matematiske kunnskapsområda, samanhengar mellom desse og kommunikasjon med matematiske omgrep og bruk av formålstenlege representasjonar munnleg og skriftleg.

Standpunktvurdering

Standpunktkarakteren skal vere uttrykk for den samla kompetansen eleven har i matematikk ved avslutninga av opplæringa etter 10. trinn. Læraren skal planleggje og leggje til rette for at elevane får vist kompetansen sin på varierte måtar som inkluderer forståing, refleksjon og kritisk tenking, i ulike samanhengar. Læraren skal setje karakter i matematikk basert på kompetansen eleven har vist, både skriftleg, munnleg og digitalt, ved å bruke matematiske uttrykksformer, bruke problemløysingsstrategiar og reflektere over og argumentere for løysingar og modellar.