Matematikk 1.-10. trinn (MAT01‑06)
Kompetansemål og vurdering

Eksempel på samanhengar

Forklaring

Kompetansemål etter 8. trinn

Mål for opplæringa er at eleven skal kunne

  • rekne med potensar og kvadratrøter og forklare framgangsmåtar og resultat
  • bruke kommutative, assosiative og distributive eigenskapar til å utvikle og kommunisere strategiar for hovudrekning og skriftleg rekning
  • beskrive og utforske faktorisering og primtalsfaktorisering og bruke det i brøkrekning
  • utforske og generalisere geometriske mønster og tallmønster med eigne ord og algebraisk
  • lage og forklare rekneuttrykk med tal, variablar og konstantar knytte til praktiske situasjonar
  • lage og løyse likningar knytte til praktiske situasjonar og kritisk vurdere løysingar
  • bruke ulike strategiar for å løyse ulikskapar og vurdere om løysingar er gyldige
  • beskrive, samanlikne og utforske funksjonar knytte til praktiske situasjonar
  • bruke situasjonar, tabellar, grafar og uttrykk til å representere funksjonar og vise samanhengar mellom representasjonane
  • utforske korleis algoritmar kan skapast, testast og forbetrast ved hjelp av programmering

Undervegsvurdering

Undervegsvurderinga skal bidra til å fremje læring og til å utvikle kompetanse i matematikk. Elevane viser og utviklar kompetanse i faget på 8. trinn når dei beskriv, bruker og utforskar reknereglar, funksjonar, likningar, ulikskapar og geometriske mønster og talmønster i problemløysing og praktiske situasjonar. Elevane viser og utviklar òg kompetanse i matematikk når dei vekslar mellom ulike representasjonar, stiller matematiske spørsmål, forklarer matematiske samanhengar og argumenterer for eigne og andre sine løysingar. Vidare viser og utviklar dei kompetanse i matematikk ved å ta i bruk formålstenlege strategiar og matematiske omgrep både munnleg og skriftleg.

Læraren skal leggje til rette for elevmedverknad og stimulere til lærelyst ved at elevane får beskrive, bruke og utforske matematikk gjennom å bevege seg, leike, undre seg og arbeide praktisk. Læraren skal vere i dialog med elevane om utviklinga deira av omgrep og strategiar for å løyse rekneuttrykk, likningar og ulikskapar, av fleksibel bruk av representasjonar i funksjonar og av utforsking av mønster og algoritmar i programmering. Elevane skal få høve til å prøve og feile. Med utgangspunkt i kompetansen elevane viser, skal dei få høve til å setje ord på kva dei opplever at dei får til, og kva dei får til betre enn tidlegare. Læraren skal gi rettleiing om vidare læring og tilpasse opplæringa slik at elevane kan bruke rettleiinga for å utvikle rekneferdigheiter og kompetanse i utforsking og problemløysing knytt til algebra, funksjonar og modellering og kommunikasjon med matematiske omgrep og bruk av formålstenlege representasjonar skriftleg og munnleg.