Matematikk 1.-10. trinn (MAT01‑06)
Kompetansemål og vurdering
Forklaring
Kompetansemål etter 9. trinn
Mål for opplæringa er at eleven skal kunne
- lage og løyse problem som handlar om samansette måleiningar
- utforske eigenskapane ved ulike todimensjonale figurar og forklare omgrepa formlikskap og kongruens
- bruke formlikskap og læresetninga til Pytagoras til utforsking av praktiske situasjonar
- utforske, beskrive og argumentere for samanhengar mellom sidelengdene i trekantar
- utforske og argumentere for korleis det å endre føresetnader i geometriske problemstillingar påverkar løysingar både praktisk og algebraisk
- bruke og argumentere for formlar for overflateareal og volum av tredimensjonale figurar
- tolke og kritisk vurdere statistiske framstillingar frå media og lokalsamfunnet
- rekne på sentralmål og spreiingsmål i eigne og reelle datasett og bruke resultata til å beskrive dataa
- samanlikne og argumentere for korleis framstillingar av tal og data kan brukast for å fremje ulike synspunkt
- berekne og vurdere sannsyn i statistikk og spel
- simulere utfall i tilfeldige forsøk og berekne sannsynet for at noko skal inntreffe, ved å bruke programmering
Undervegsvurdering
Undervegsvurderinga skal bidra til å fremje læring og til å utvikle kompetanse i matematikk. Elevane viser og utviklar kompetanse i faget på 9. trinn når dei beskriv, bruker og utforskar formlikskap, kongruens, læresetninga til Pytagoras, samanhengar mellom sidelengdene i trekantar, formlar for overflateareal og volum av tredimensjonale figurar og statistiske framstillingar i problemløysing og praktiske situasjonar. Elevane viser og utviklar òg kompetanse i matematikk når dei stiller matematiske spørsmål, forklarer matematiske samanhengar og argumenterer for og vurderer kritisk eigne og andre sine løysingar. Vidare viser og utviklar dei kompetanse i matematikk ved å ta i bruk formålstenlege representasjonar, strategiar og matematiske omgrep både munnleg og skriftleg.
Læraren skal leggje til rette for elevmedverknad og stimulere til lærelyst ved at elevane får beskrive, bruke og utforske matematikk gjennom å bevege seg, leike, undre seg og arbeide praktisk. Læraren skal vere i dialog med elevane om utviklinga deira av omgrep, strategiar og matematisk argumentasjon i arbeid med eigenskapar ved geometriske figurar, berekning av overflateareal, volum, sannsyn, sentralmål og spreiingsmål og kritisk vurdering av statistikk. Elevane skal få høve til å prøve og feile. Med utgangspunkt i kompetansen elevane viser, skal dei få høve til å setje ord på kva dei opplever at dei får til, og kva dei får til betre enn tidlegare. Læraren skal gi rettleiing om vidare læring og tilpasse opplæringa slik at elevane kan bruke rettleiinga for å utvikle rekneferdigheiter og kompetanse i utforsking og problemløysing knytt til geometri, statistikk og sannsyn og kommunikasjon med matematiske omgrep og bruk av formålstenlege representasjonar munnleg og skriftleg.